"Тавантолгой" ХК-ийн Гүйцэтгэх захирлын үүрэг гүйцэтгэгч Ч.Гүнждагва

Өмнийн шаргал говь нутагтаа өрхөө татаж үүдээ нээсэн Монгол улсын ууган уурхайнуудын нэг орон нутгийн өмчит “Тавантолгой” ХК нь өдгөө 58 жилийн түүхэн ойтойгоо золгож, амжилт бүтээлийн түүхэн жимээр урагшилсаар байна.  Үе үеийн уурхайчдын нөр их хөдөлмөрийн үр шимээр айл бүрийн тулганд галыг бадрааж, улс нийгэмдээ илч дулааныг ЗУУНААС ЗУУНД түгээсээр байгаа нийт уурхайчин хамт олныхоо нэрийн өмнөөс Монгол улсад уул уурхайн салбар үүсч хөгжсөний түүхт 102 жилийн ойн баярын мэндийг  өргөн дэвшүүлье. 

“Тавантолгой” ХК нь уул уурхайн салбарт өөрийн гэсэн онцлогтой баялаг түүхийг бүтээж, амжилт бүтээлээрээ манлайлан, нийгмийн өмнө хүлээсэн үүргээ нэр төртэйгээр биелүүлж, улс, орон нутгийн төсөв, татварын хууль тогтоомжийн үзүүлэлтээр Монгол улсын ТОП-100 аж ахуй нэгж, ШИЛДЭГ ТАТВАР ТӨЛӨГЧ-өөр шалгарч, хөрөнгийн зах зээлд томоохон байр суурь эзлэсэн А зэрэглэлийн хувьцаат компани болтлоо хөгжин дэвшсээр байна.

Үе үеийн уурхайчдын бүтээн байгуулсан нөр их хөдөлмөр бүтээлийн үр шимээр Тавантолгойн бүлэг ордоос анхны экспортыг эхлүүлж өнөөдрийн тээвэр ложистикийн суурийг тавьсан явдал нь говь нутгийн болоод улс эх орны хөгжилд өөрчлөлт шинэчлэлийг дагуулж, олон олон бүтээн байгуулалтууд бий болж хөгжилд хурд нэмэх түүхэн алхмыг эхлүүлсэн юм.

Уурхайчид бид улс, эх орныхоо өмнө хүлээсэн үүргээ нэр төртэй биелүүлж, эдийн засгийн хүнд ачааг нуруундаа үүрч, зогсох эрхгүй ажиллаж буй золбоо хийморь дүүрэн гэгээн үйлсийн эзэд билээ.

Зуун дамжсан уурхайчдын яруу алдар мөнхөд бадамлаж байх болтугай.